Бишкекте окуучу кыздарга карата зордук-зомбулук фактылары боюнча иликтөө башталды. Социалдык тармактарда кыздардын аброюна шек келтирген видеолордон улам милицияга жаран кайрылган. Барактын администраторлорун аныктоо иштери жүрүп жатат.
Чүй облусунан жана борбордон аскердик кызматка аттанып жаткан алгачкы аскер кызматкерлерин Бишкектен узатышты. 3000ден ашык жаштар ар кандай аскердик жана мамлекеттик мекемелерде кызмат өтөшөт. Чакыруу 2024-жылдын ноябрь айынын аягына чейин уланат.
Бишкекте эки өлкөнүн кызматташтыгын бекемдөөгө багытталган “Кыргызстан-Кытай достук коому” коомдук бирикмеси ачылды. Кыргыз Республикасынын Министрлер Кабинетинин Төрагасынын биринчи орун басары, Кытай Эл Республикасынын элчиси баш болгон иш-чаранын катышуучулары экономика, маданият жана билим берүү тармагындагы стратегиялык байланыштардын маанилүүлүгүн баса белгилешти. Уюм эки тарапка тең пайдалуу кызматташтыкты илгерилетүү менен ишкер мамилелерди өнүктүрүүгө жана инвестиция тартууга ниеттенүүдө.
Талас облусунда «Йакын инкар» РЭТинин радикал-экстремисттик идеологиясына каршы профилактикалык иш-чаралар жүргүзүлдү. Топтун мүчөлөрү коркунучту түшүнүп, коопсуздук органдарынан расмий эскертүү алган соң мүчөлүктөн баш тартышкан.
Кыргызстандын Улуттук банкы жарандарга расмий катка жамынып крипто капчыктардан акча алууну сунуштап жаткан шылуундар тууралуу эскертет. Көзөмөл орган жеке адамдарга кызмат кылбасын эскертип, мындай сунуштарга ишенбөөгө чакырат. Алдамчылык фактылары катталган учурда дароо карталарды жаап, укук коргоо органдарына кайрылуу сунушталат.
Бишкекте 14-сентябрда Бүткүл дүйнөлүк тазалык күнүнө арналган күзгү жалпы шаардык ишембилик өткөрүлөт. Катышуучулар ирригациялык тармактарды, жергиликтүү аймактарды жана шаардык сейил бактарды тазалашат. Мэрия шаар тургундарын ишембиликке активдүү катышууга чакырат.
“Бишкек шаардык транспорт” муниципалдык ишканасы кызматкерлерди, анын ичинде “D” категориясындагы күбөлүктөрү бар айдоочуларды, экономистти жана паромдун айдоочуларын кабыл алууда. Квалификацияны жогорулатуу учун шарттар тузулген.
Кыргыз милициясынын 100 жылдыгына карата Ички иштер министрлигинин күзөт кызматынын полкунун кызматкерлери Комсомолец чокусуна чыгышты. 4205 метр бийиктикте кесиптештерин, ардагерлерин куттуктап, белги орнотуп, желек көтөрүштү.
Кыргыз Республикасынын Министрлер Кабинети окуучулар үчүн ден соолук жана коопсуз шарттарды түзүүгө багытталган мектептерде тамактанууну уюштуруунун жаңы жобосун бекитти. Жергиликтүү бийлик органдарына мектеп окуучуларынын, өзгөчө турмуштук оор кырдаалга кабылган балдардын тамак-ашын жакшыртууга каражат бөлүү сунушталды. Ошондой эле 2025-жылдын аягына чейин тамак-аш кайра иштетүү тармагынын жумушчуларын аттестациялоо жана квалификациясын жогорулатуу пландаштырылууда.
КР МУКК кызматкерлери экстремисттик идеологиянын зыяндуулугун түшүнүп, ага колдоо көрсөтүүдөн баш тарткан тыюу салынган “Хизб ут-Тахрир аль-Ислами” уюмунун эки мүчөсү менен профилактикалык иш-чараларды өткөрүштү. Аларга эскертүү берилип, жарандарга экстремисттик топторго катышкандыгы үчүн кылмыш жоопкерчилиги эскертилген.
