Кыргызстандык студенттер Москвадагы Гоголь атындагы театрда практикалык окуудан өтүштү
8-14-май күндөрү Т. Абдумомунов атындагы Кыргыз улуттук академиялык драма театрынын Театр окуу жайынын студенттери Москвадагы Н. В. Гоголь атындагы драма театрында практикалык сабактарды өтүштү. Бул иш-чара эки мекеменин кызматташуу келишиминин алкагында уюштурулуп, келечектеги артисттердин чыгармачылык потенциалын өнүктүрүүгө багытталган. Студенттер актердук чеберчилик боюнча лекцияларга, мастер-класстарга, артисттер жана режиссерлор менен жолугушууларга катышты. Анатолий Просаловдун мастер-классы өзгөчө кызыгуу жаратты. Ошондой эле, окуучулар театрдын репертуарындагы спектаклдерди көрүп, режиссерлор Кирилл Ковбас жана Антон Яковлев менен талкуулашты. Программа алкагында театрдын директору Александр Бочарников менен ачык жана бейформал жолугушуу болду. Практикалык сабактар Кыргызстандын эл артисти Гүлайым Каниметованын кураторлугунда өттү.
