Ош шаарында Кыргызстандын маданият кызматкерлеринин күнүн белгилеп, маданият жана искусствону өнүктүрүүгө кошкон салымы үчүн тармактын мыкты өкүлдөрүн Ардак грамота жана ыраазычылык баракчалары менен сыйлашты.
Ысык-Көл районунун Теплоключенка айылында селден улам бузулган көпүрөнүн курулушу аяктады. Ачылышка жергиликтүү аксакалдар, бийлик өкүлдөрү катышып, куруучуларга ыраазычылыктарын билдиришти. Иш 2023-жылы башталган.
Бишкекте “Алтын күз” жарманкеси өтүп, ага 25-30 миң адам келген. 200гө жакын айыл чарба өндүрүүчүлөрү катышып, өндүрүүчүлөрдүн баасында органикалык товарларды сунушташты. Эт, картошка, жумуртка жана башка азык-тулуктер конкуренцияга жарамдуу баада алынды. Жыйындын катышуучуларына айыл чарбасын өнүктүрүүгө кошкон салымы үчүн ыраазычылык баракчалары тапшырылды.
Бакай Маканбаев Евразиялык экономикалык комиссиянын протоколдук жана уюштуруучулук камсыздоо департаментинин директору болуп дайындалды. Ал 1993-жылы туулган, Кыргыз-Орус Славян университетин жана Орусиянын Тышкы иштер министрлигинин Дипломатиялык академиясын аяктаган. 2018-жылдан бери бул комиссияда ар кандай кызматтарды аркалап, протокол бөлүмүнүн башчысы болуп иштеп келген. Үй-бүлөлүү, уулу бар.
