Бишкекте Кыргыз Республикасынын Сапат сыйлыгын ыйгаруу боюнча кеңештин жыйыны өтүп, анда 78 арыз каралды. Сыйлык ишканаларды продукциянын жана кызмат көрсөтүүлөрдүн сапатын жакшыртууга, ошондой эле башкаруунун эффективдүү системаларын киргизүүгө шыктандырат. Сынактын жыйынтыгы жана 2025-2026-жылдарга иш планы бекитилди.
Кыргызстандын Сауд Аравиядагы элчиси Улукбек Марипов Раид бин Ибрагим Аль-Мадехим менен соода-экономикалык мамилелерди тереңдетүү маселесин талкуулап, Сауд Аравиясынан Кыргызстанга боло турган бизнес делегациясынын иш сапарына токтолду. Тараптар ийгиликтүү өз ара визиттерди жана үзгүлтүксүз авиакаттамдарды ишке ашырууну белгилешти, ошондой эле соода жүгүртүүнү жогорулатуу боюнча мындан аркы кызматташууну макулдашышты.
Кыргызстандын Министрлер Кабинетинин Төрагасы Акылбек Жапаров Мюнхенге «Кыргызстандын экономика күнү» бизнес-форумуна жана Ишкерлер кеңешинин жыйынына катышуу үчүн барат. Сапардын алкагында эки тараптуу жолугушуулар жана ишканаларга баруу пландаштырылууда.
