🇰🇬 Кыргызстандын жарандарына Россияда миграция мыйзамдарын бузгандыгы үчүн “кара тизмеге” киргендерге 2025-жылдын сентябрына чейин укуктук макамын жөнгө салуу мүмкүнчүлүгү берилди.
📄 Бул мүмкүнчүлүк Кыргызстандын президенти Садыр Жапаровдун Россия президенти Владимир Путинге мигранттардын документтерин легалдаштыруу мөөнөтүн узартуу өтүнүчү менен кайрылуусунан кийин пайда болду.
👥 Учурда 70 миңге жакын кыргызстандык “кара тизмеде” турат, бирок алардын ичинен болгону 3 миңге жакын адам реестрден чыга алды.
🕒 Жарандарга кайрылуу: убакытты текке кетирбеңиздер, миграциялык бөлүмдөргө же Кыргызстандын Россиядагы элчилигине жана консулдук мекемелерине кайрылып, зарыл маалыматты тактап, укуктук макамды легалдаштыруу процедурасын баштаңыздар.
📋 Реестрден чыгуу үчүн төмөнкү кадамдарды жасоо зарыл: миграциялык бөлүмгө кайрылып, реестрге кирүү себебин тактоо, дактилоскопиядан өтүү жана медициналык кароодон өтүү.
📑 Эгерде документтерде кемчиликтер болсо, административдик жоопкерчилик каралып, 5000–7000 рубль өлчөмүндө айып пул салынат. Айып пул төлөнгөндөн кийин документтер легалдаштырылат.
🕘 Россия тарап ички иштер бөлүмдөрүнүн иштөө убактысын эки саатка узартты. Бул кошумча мүмкүнчүлүктү пайдаланып, мөөнөттү узартууга үмүт артпай, маселени өз учурунда чечүү керек.
✅ Өз убагында легалдаштыруу — ар бир жарандын жеке жоопкерчилиги.
