Иран менен АКШнын ортосундагы чыңалгандык сакталып турган шартта, тараптар жөнгө салуу боюнча азырынча макулдашууга жетишкен жок. Ошого карабастан, мамлекеттердин ортосунда ортомчулар аркылуу билдирүүлөрдү алмашуу уланууда.
Бул тууралуу Ирандын ТИМдин расмий өкүлү Исмаил Багаи билдирди, деп жазат Anadolu. Анын айтымында, Вашингтондун мурунку позициясы Тегеранга кырдаалды дипломатиялык жол менен чечүүнүн келечегин оптимисттик баалоого мүмкүндүк бербейт.
Ормуз кысыгын ачуу шарттары
Андан тышкары, Ирандын Улуттук коопсуздук жогорку кеңешинин башкы катчысы Мохсен Резаи Тегеран АКШ тарабынан бир катар талаптар аткарылмайынча Ормуз кысыгын ачууга ниеттенбей турганын баса белгиледи. Анын айтымында, кысыкты ачуу үчүн Ирандын койгон жети шартына толук жана так жооп берилип, алар аткарылышы керек.
Ирандын позициясы жана жооп чараларына даярдыгы
Ирандын ТИМдин өкүлү ошондой эле Ирандын куралдуу күчтөрү эң жогорку даярдык деңгээлинде экенин жана жаңы чабуулдар болгон учурда жооп соккусун берүүгө жөндөмдүү экенин белгиледи.
Жөнгө салууда ортомчулукту Катар жүргүзүп, ал чыңалгандыкты азайтууга жана Ормуз кысыгы аркылуу кеме жүрүүнү кайра жандандырууга аракет кылууда. Мурун катарлык ортомчулар Тегеранда иран делегациясы менен сүйлөшүүлөрдү жүргүзүшкөн, андан кийин консультациялар Дохада улантылып, тараптар кризистен чыгуунун мүмкүн болгон жолдорун талкуулашкан.
