Баткен облусунун Кадамжай районунда турак жай фондун жаңылоо боюнча долбоор башталды. Демилгени Жогорку Кеңештин экс-депутаты Токтобубу Оргалчанын компаниясы ишке ашырууда. Ал эми ыкманын негизинде Кытайда ийгиликтүү колдонулган жаңылоо практикасы алынган.
Токтобубу Оргалчанын билдирүүсүнө ылайык, бул модель эскирген турак жайлардын ордуна жаңы көп кабаттуу үйлөрдү курууну карайт. Жаңы объекттердеги батирлердин бир бөлүгү тургундарга берилет, ал эми калган бөлүгү сатылат. Ишкердин айтымында, бул тажрыйбаны өлкөнүн башка региондорундагы башка инвесторлор да колдоно алышат.
Долбоордун форматы Кыргызстан үчүн өзгөчө болгондуктан, документтерди тариздөө үчүн кошумча убакыт талап кылынган, бирок ишке ашыруу жергиликтүү бийлик органдарынын колдоосу менен жүрүп жатат. Учурда биринчи объектте курулуш иштери жүрүп жатат.
Өнүктүрүү пландары жана экономикалык натыйжа
Долбоордун алкагында Кадамжай районунда 12 кабаттуу имараттарды куруу пландалууда. Бул авариялык турак жайлардын көйгөйүн гана чечпестен, региондун экономикасына жана жумуш орундарын түзүүгө оң таасирин тийгизет деп күтүлүүдө.
Турак жай курулушунан тышкары, Оргалча компаниясы Баткен облусунда бир катар өнөр жай демилгелерин ишке ашырууда. Мисалы, Лейлек районунда газ блокторун чыгаруучу завод ишке киргизилсе, Айдаркенде кирпич заводунун курулушу жүрүп жатат.
Кытай кантип өнүктү? Эски үйлөрдүн ордуна жаңы чоң үйлөрдү куруп, жарандарга акысыз турак жай берди. Батирлердин бир бөлүгүн сатышты. Мен бул тажрыйбаны Кадамжай районунда колдонууну чечтим.










