Кыргызстанда 12 жылдык билим берүү практикасына киришүүнүн алкагында жаңы окуу китептери чыгарылды. Алардын ичинде үчүнчү класска арналган "Табигый илимдер" комплекси өзгөчө орунда турат.
Билим берүү жана илим министрлигинин маалыматына караганда, ушул комплекстин экинчи бөлүгү 178 512 нускада басылып чыккан. Алардын ичинен 103 миңден ашыгы кыргыз тилдүү мектептерге, ал эми болжол менен 75 миңи орус тилдүү мектептерге багытталат.
Окуу китептеринин басылышы
Мурда аталган окуу китептеринин биринчи бөлүгү да так ушундай тираж менен чыгып, эки бөлүктүн жалпы тиражы 357 024 нускага жетти. Учурда китептер республикадагы мектептерге жеткирилүүгө даярдалып жатат.
Бул жаңы интеграцияланган предмет 1-класстан 9-класска чейин окутулуп, физика, химия жана биология дисциплиналарын бириктирет. Ал эми 10-12-класстарда профильдик билим берүү формасында бул предметтер өзүнчө окутулат.
