Татарстандын өкүлдөрү санариптик технологиялар чөйрөсүндө кыргызстандык тажрыйбаны изилдөөгө кызыгуусун билдиришти. Блокчейн жана криптоиндустрия тармагында өнөктөштүктү өнүктүрүү пландары Бишкектеги Asia Innovation Forum 2026 эл аралык форумуна карата «Кабар» агенттигинде өткөрүлгөн пресс-конференцияда жарыяланды.
Asia Innovation Forum'дун техникалык директору жана Татарстан Республикасынын Криптополигонунун долбоорлор боюнча директору Самат Фаскудинов бул багыт 2022-жылдан бери жигердүү өнүгүп жатканын билдирди. Татарстандын Санариптик өнүктүрүү министрлигинин колдоосу менен блокчейн-долбоорлорду тестирлөө үчүн адистештирилген аянтча уюштурулган.
Татарстан делегациясынын Кыргызстанга барышынын максаты — санариптик чөйрөнү жөнгө салуу жана лицензиялоо механизмдерин изилдөө. Толук кандуу тажрыйба алмашуу үчүн форумга Татарстандын профилдик кызматкерлери жана министрликтердин өкүлдөрү чакырылды.
Криптополигондун жетекчиси Тимур Назаров өнөктөш үчүн регион издөө аянтчанын адистери тарабынан 2026-жылдын башынан бери жүргүзүлгөнүн баса белгиледи. Анын айтымында, Кыргызстан финансылык жана блокчейн-технологиялар үчүн өнүккөн инфраструктурага ээ, бул кеңири аудитория үчүн мындай тандоо күтүүсүз болсо да, аны келечектүү өнөктөш кылат.
