Улуттук госпитал 2026-жылдын 20-июлунан тарта башкаруу жана каржылык автономиянын апробациялык режиминде, жаңы бекитилген баа прейскуранты боюнча пациенттерди кабыл алууну баштады.
Бул өзгөрүүлөр Кыргыз Республикасынын Президентинин «Кыргыз Республикасынын мамлекеттик саламаттык сактоо уюмдарынын потенциалын жана атаандаштыкка жөндөмдүүлүгүн жогорулатуу боюнча чаралар жөнүндө» Жарлыгына, Министрлер Кабинетинин токтомуна жана Саламаттык сактоо министрлигинин буйругуна ылайык киргизилүүдө.
Медициналык мекеменин маалыматы боюнча, апробациялык режим мамлекеттик саламаттык сактоо уюмдарын башкаруу системасын өркүндөтүүгө, ресурстарды пайдалануунун натыйжалуулугун жогорулатууга жана медициналык жардамдын сапатын жакшыртууга багытталган.
Кимдер үчүн медициналык жардам акысыз бойдон калат?
Милдеттүү медициналык камсыздандыруу (ОМС) боюнча камсыздандырылган жарандар үчүн эч нерсе өзгөрбөйт. Эгер сиз жашаган жериңиздеги үй-бүлөлүк медицина борборунан (ҮМБ) же үй-бүлөлүк дарыгерлер тобунан (ҮДТ) электрондук жолдомо менен Улуттук госпиталга кайрылсаңыз, медициналык жардам Мамлекеттик кепилдиктер программасынын алкагында мурунку шарттарда көрсөтүлөт.
Чукул медициналык жардам бардык пациенттерге, ОМС полисинин, документтеринин же жарандыгынын болушуна карабастан, пациентти кризистик абалдан чыгарганга чейин акысыз көрсөтүлөт. Бул эреже өзгөрүүсүз калат.
Кимдер жаңы прейскурант боюнча кызматтарды төлөйт?
Медициналык кызматтардын толук баасы төмөнкү учурларда төлөнөт: ОМС полиси жок жана жеңилдетилген категорияга кирбеген Кыргыз Республикасынын жарандары.
