Аталган иш-чара Аргентинада расмий түрдө көрсөтүлгөн биринчи кыргыз көркөм тасмасы катары тарыхта калды. Уюштуруучулардын айтымында, бул Борбордук Азия өлкөлөрүнүн кинопоказ жана китеп бет ачар сериясын баштады. Аталган серия Аргентина жана Латын Америкасынын башка өлкөлөрүндө өтөт.
Бул демилге 2027-жылдын октябрь айында Аргентинада өтө турган 15-Евразиялык ачык китеп форуму жана адабият фестивалынын (Open Eurasian Book Forum & Literature Festival, OEBF) алдында ишке ашууда.
Иш-чарага дипломатиялык корпустун өкүлдөрү, маданий уюмдар, жазуучулар, кинематографисттер, студенттер жана Евразиянын тарыхына жана маданиятына кызыккан Буэнос-Айрестин тургундары катышты.
Юнус Эмре институтунун Буэнос-Айрестеги директору Чаглар Эртебер куттуктоо сөзүн сүйлөп, институттун ишмердүүлүгү жана эл аралык маданий демилгелер жөнүндө айтып берди. Ошондой эле конокторго 50дөн ашуун өлкөнүн адабият, искусство жана кино өкүлдөрүн бириктирген Евразиялык Чыгармачыл Гильдия тааныштырылды.
Кеченин башкы окуясы болуп, режиссёр Садык Шер-Нияздын көрүнүктүү мамлекеттик ишмер Курманжан Датка тууралуу баяндаган тасмасынын көрсөтүлүшү аталды.
