Жасалма интеллекттин (ЖИ) мүмкүнчүлүктөрү тездик менен өнүгүп жаткандыктан, дипфейктерди колдонуу менен байланышкан кылмыштардын саны да өсүүдө. Буга 2025-жылы Малайзияда болгон окуя айкын далил. Анда бир нече жогорку даражалуу саясатчыларга алардын беделине шек келтире турган видеолорду таратуу коркунучу менен каттар келип түшкөн.
Малайзиялык ЖМКлардын маалыматына ылайык, кеминде он депутат жана мамлекеттик кызматкер жасалма интеллект технологияларын колдонуу менен түзүлгөн интимдик видеолордун скриншоттору менен бирдей электрондук каттарды алышкан. Алардан 100 миң АКШ долларын которуу талап кылынып, антпесе бул материалдарды жарыялоо менен коркутушкан.
Малайзиянын Коммуникация министри Фахми Фадзиль да ушундай каттарды алганын билдирди. Анын айтымында, кылмышкерлер бир нече саясатчыга дээрлик бирдей билдирүүлөрдү жөнөтүп, дипфейк видеолордун скриншотторун тиркеп, 100 миң АКШ долларын QR-код аркылуу которууну талап кылышкан. Алдын ала текшерүүлөр көрсөткөндөй, бардык каттар бир эле электрондук почта дарегинен жөнөтүлүп, дээрлик бирдей текст жана сүрөттөрдү камтыган.
Кат алгандардын арасында мурдагы экономика министри жана парламент депутаты Рафизи Рамли, депутаттар Вонг Чен жана доктор Тауфик Жохари, жаштар жана спорт министринин орун басары Адам Адли, Селангор штатынын аткаруу кеңешинин мүчөсү Нажван Халими, ошондой эле сенатор Манола бар.
