25-июль күнү эртең менен Екатеринбург шаарында Wildberries логистикалык борборунун жанындагы унаа токтотуучу жайда өрт катталды. Бул окуя учкучсуз аппараттын (БПЛА) калдыктары кулагандан кийин болгондугу кабарланды.
Свердлов облусунун губернатору Денис Паслер учкучсуз аппараттардын чабуулун тастыктап, анын натыйжасында Екатеринбургдун Чкалов районундагы унаа токтотуучу жайда өрт чыкканын билдирди. Губернатордун айтымында, жабыркагандар жок жана инфраструктуралык, экономикалык объекттерге зыян келтирилген эмес.
Wildberries компаниясы өз кезегинде, пландаштырылган эвакуация коопсуздук талаптарына ылайык алдын ала жүргүзүлгөнүн билдирди. Компания логистикалык комплекстин өзү жабыркабаганын, бирок кампанын иши убактылуу токтотулганын белгиледи.
Жергиликтүү E1.ru басылмасы 25-июль күнү эртең менен Wildberries кампасынын аймагында коюу түтүндүн сүрөттөрүн жана видеолорун жарыялаган. Өрт өчүрүүчүлөр тарабынан өрт тез арада чектештирилген.
Буга чейин, 18-июлдан бери, ЖМКлардын маалыматына ылайык, Wildberries компаниясынын Подмосковье, Тамбов облусу, Краснодар, Ставрополь крайы, Ленинград облусу, Санкт-Петербург, Воронеж жана аннексияланган Крымдагы логистикалык борборлору менен кампалары учкучсуз аппараттардын чабуулдарына кабылган.
