«Эркин-Тоо» гезитинин башкы редактору Жазгүл Карбосованын айтымында, анын негизги өзгөчөлүгү мамлекеттик маанидеги расмий документтерди жарыялоодо. Тактап айтканда, басылмада президенттин жарлыктары менен буйруктары, ошондой эле Жогорку Кенеш кабыл алып, мамлекет башчысы кол койгондон кийинки мыйзамдар жарыяланат.
Карбосова мыйзамдардын күчүнө кирүү мөөнөттөрү алардын гезитте расмий жарыяланган учур менен аныктала турганына көңүл бурду. Ал басылма өзгөчө статуска ээ болуп, кадимки ЖМКнын чегинен чыгып, архивдик документ катары иштей турганын белгиледи.
Архивдик документ статусуна карабастан, басылма санариптик мейкиндикте активдүү өнүгүп жатат. Басма номеринде жарыяланган маалымат окурмандарга сайт жана социалдык тармактар аркылуу жеткирилет. Азыркы учурда гезиттин тиражы 4,5 миң нусканын тегерегинде, ал эми редакцияда 27 кызматкер иштейт.
- Номерлердин көлөмү ар кандай: айрым номерлер 16, 32 жана 48 бет болуп чыгат, жакында 128 беттик номер жарык көрдү.
