Ири токой өрттөрү Франциянын түштүк-батыш аймактарын жана Испаниянын борбордук бөлүгүн каптады. Бул кырсыктан улам 200 миңден ашуун адам эвакуацияланып, жабыркагандар да катталды. Euronews билдиргендей, Испанияда токой өрттөрүнө байланыштуу тарыхта биринчи жолу өзгөчө кырдаал жарыяланды.
Франциядагы абал
Францияда Атлантика океанынын жээгинде жайгашкан Кап-Ферре курорттук жарым аралынан адамдар толугу менен эвакуацияланды. Жергиликтүү тургундар жана туристтер кургактык жана суу аркылуу чыгарылган. Болжол менен 1 500 адам Аркашонго суу таксилери жана ири кемелер менен жеткирилди.
Жиронда департаментинде миңге жакын өрт өчүрүүчү от менен күрөшүп жатат. Франциянын Ички иштер министрлигинин маалыматы боюнча, бул аймактан 110 миң адам, ал эми коңшу Ланд департаментинен 31 миң адам эвакуацияланган.
Франциядагы өрттүн кесепеттери
Жалпысынан Франциянын аймагында 32 токой өртү катталган. Жыл башынан бери от 50 миң гектардан ашык жерди жок кылган, бул өткөн жылга караганда дээрлик үч эсе көп.
Испаниядагы кырдаал
Испания өкмөтү токой өрттөрүнө байланыштуу тарыхта биринчи жолу өзгөчө кырдаал режимин киргизди. Мадрид жана Авила провинцияларындагы үч ири өрт очогун азырынча көзөмөлгө алуу мүмкүн болбой жатат. Бийлик алардын биригип кетишинен кооптонууда.
Испанияда болжол менен 60 миң адам эвакуацияланган же үйдөн чыкпоого чакырылган. Кастилия жана Леон өкмөтүнүн өкүлү Никанор Сен Бургогондо аймагындагы өрт Мадрид тараптан жайылып келе жаткан от менен жакында биригиши мүмкүн экенин эскертти. Мадрид автономдуу коомунун башчысы Исабель Диас Аюсо болуп жаткан окуяны борбордун тарыхындагы эң начар өрттөр деп атады.
Өрт ЮНЕСКОнун Бүткүл дүйнөлүк мурасы объектилерине жакындап келе жатат.
