Кыргызстанда медициналык-социалдык экспертиза (МСЭК) процесси санарип форматка өткөрүлүүдө. Бул тууралуу пресс-конференцияда Эмгек, социалдык камсыздоо жана миграция министрлигинин майыптыгы бар жана карыя жарандарга карата чечимдерди даярдоо башкармалыгынын башчысы Назгуль Чолумова билдирди.
МСЭК системасы тууралуу жалпы маалымат
Жарандарды күбөлөндүрүүнү Республикалык медициналык-социалдык экспертиза борбору жана Эмгек, социалдык камсыздоо жана миграция министрлигинин алдындагы 27 аймактык медициналык-социалдык эксперттик комиссия (МСЭК) жүргүзөт. МСЭКтин ишмердүүлүгү КР министрлер кабинетинин 2025-жылдын 8-апрелиндеги № 185 токтому менен жөнгө салынат.
Процессти санариптештирүүнүн максаттары
МСЭК системасында көрсөтүлүп жаткан кызматтардын натыйжалуулугун жана ачык-айкындуулугун жогорулатууга негизги көңүл бурулат. Санариптештирүүнүн алкагында адам факторунун таасирин азайтууга, ички көзөмөлдү күчөтүүгө жана коррупциялык тобокелдиктерди алдын алууга багытталган иштер жүргүзүлүүдө.
Назгуль Чолумованын айтымында, акыркы эки жылда МСЭКтен өтүү процесси бүт республиканын аймагында санариптештирилди. Жаңы процесстин алкагында жарандар алгач толук текшерүү жүргүзгөн медициналык уюмдарга кайрылышат. Майыптыкты белгилөө үчүн негиздер аныкталган учурда, медициналык мекеме МСЭКке 088/у формасы боюнча электрондук форматта жолдомо, ошондой эле тиешелүү медициналык документтерди жөнөтөт.
