Акыркы жылдары Кыргызстан КМШ өлкөлөрүнүн жарандары үчүн эң популярдуу туристтик багыттардын бирине айланды. Өлкөнүн кооз жаратылышы, жеткиликтүү баалары жана визасыз режим туристтердин санын туруктуу өсүшүнө өбөлгө түзүүдө. Бул өсүштүн негизи чек аралардын ачылышы, коңшу мамлекеттер менен кызматташтыктын кеңейиши жана инфраструктуранын жакшырышы болуп саналат.

Туристтик агым тездик менен өсүүдө

Улуттук статистика комитетинин акыркы маалыматтары боюнча, 2025-жылы туристтик сектордо эс алгандардын жалпы саны 5,31 миллион адамды түзгөн. Бул 2024-жылдагы 3,66 миллион адамга салыштырмалуу 45,2%га көп.

Туристтик агымдын көрсөткүчтөрү

5,31 млнжалпы эс алгандар (2025)
3,66 млнжалпы эс алгандар (2024)
+45,2%жалпы өсүш
3,57 млнуюштурулган туризм (2025)
+50,3%уюштурулган өсүш
1,73 млнуюштурулбаган туризм (2025)
+36,2%уюштурулбаган өсүш

Туристтик агымдын өсүшү эс алуу борборлору, мейманканалар жана туристтик компанияларды камтыган уюштурулган туризм секторунда да, конок үйлөрү жана жергиликтүү тургундардан батир ижарага алуу сыяктуу уюштурулбаган туризм жаатында да байкалган.

Коңшу мамлекеттер менен чек аралардын ачылышы жана инфраструктуранын жакшырышы туристтердин Кыргызстанга болгон кызыгуусун арттырууда. Бул тууралуу «Кабар» агенттигине туризм тармагындагы эксперт Азамат Жаманкулов билдирди.

2000–2010-жылдары жана андан кийинки жылдары биз КМШ өлкөлөрү үчүн жабык болгонбуз жана бири-бирибизге көп барчу эмеспиз. Коңшуларыбыздын саякаттоо үчүн экономикалык мүмкүнчүлүктөрү да чектелүү болчу. Бүгүнкү күндө коңшу мамлекеттердин жарандарынын саякаттоо мүмкүнчүлүктөрү кыйла кеңейди.
Азамат Жаманкулов, туризм тармагындагы эксперт