Президент Токаев өз билдирүүсүндө, ага түрдүү тараптардан, анын ичинде АКШ жана Европа өлкөлөрүнөн ортомчу болуу боюнча көптөгөн чакырыктар келип түшкөнүн айтты. Бирок ал Орусия менен Украинанын ортосунда ортомчу болуудан кескин түрдө баш тартаарын баса белгиледи.
Жаңжалды тоңдуруу сунушу
Омск шаарында Владимир Путин менен болгон сүйлөшүүлөрдө Токаев жаңжалды «тоңдуруп», «Стамбул формуласы 2.0» форматына кайтууну сунуш кылды. Ал бул формулада «олуттуу натыйжаларга жетишилгендигин» эске салды жана «улуу державалардын, анын ичинде Орусиянын кепилдиктери астында» мындан ары тынчтыкка карай умтулуу керектигин айтты.
Казакстандын президенти согушту токтотуу зарыл экенин кошумчалады, анткени «согушта Орусия менен Украинанын жаштары каза болууда». Ал ошондой эле орус-украин жаңжалынын мүнөзү көптөр үчүн түшүнүксүз бойдон калып жатканын белгиледи.
Токаев Казакстан ар дайым украин элине, алардын маданиятына жана тилине урмат менен мамиле жасап келгенин баса белгиледи. Ал ошондой эле Путин Аляскадагы АКШ менен болгон сүйлөшүүлөрдө «максималдуу дипломатиялык ийкемдүүлүктү» көрсөткөнүн айтты.
