Жогорку Кеңештин финансы, бюджет, ишкерчилик жана атаандаштыкты өнүктүрүү боюнча комитетинин жыйынында депутат Камила Талиева өлкөнүн ички карызынын өсүшү маселесин көтөрдү. Анын айтымында, башында 56,1 млрд сом деңгээлинде бекитилген мамлекеттик баалуулук кагаздарынын көлөмү 2026-жылдын тогуз айында 92 млрд сомго жетти.
Депутат Улуттук банктын эскертүүлөрүнө таянып, алардын негизинде ички карыздын көбөйүшү инфляциянын деңгээлине жана банктык ишине таасир этиши мүмкүн экенин айтты. Ал Финансы министрлигинен мындай динамиканын коопсуздугу боюнча расмий түшүндүрмө берүүнү суранды.
Министрлер Кабинетинин төрагасы Адылбек Касымалиев баалуулук кагаздарын чыгаруу аркылуу ички карыздын өсүшү башкаруу инструменти экенин, бирок негизги талап — мамлекеттик карызды ИДПнын 70%дан ашпаган деңгээлинде чектөө — сакталып жатканын түшүндүрдү. 30-сентябрга карата бул көрсөткүч 38,75% түзүлдү.
Бул каражаттар жөн эле эмес, мамлекеттик банктарды жана энергетика тармагын капиталдаштырууга жумшалат, алар кийин бизге дивиденд төлөп турушат. Натыйжада каражаттар экономиканы өнүктүрүүгө кетет
Финансы министри Руслан Суйналиев мамлекеттик карыздын абалы туруктуу бойдон калууда деп кошумчалады. Учурдагы модельдин башкы артыкчылыгы катары ал валюталык тобокелдиктердин жоктугун атады, анткени эсептешүүлөр улуттук валютада жүргүзүлөт.









