Маалыматтарга ылайык, Орусия президенти Владимир Путин мигранттарга карата талаптарды күчөткөн мыйзамдарга кол койгонун Sputnik Кыргызстан жана Kaktus.media басылмалары билдиришти. Жаңы эрежелер өлкөдөгү эмгек мигранттарынын жана алардын үй-бүлө мүчөлөрүнүн жашоо-шартын жөнгө салат.
Мыйзамдардын негизги жоболору
Жаңы мыйзамга ылайык, чет элдик жумушчулар өздөрүн жана чогуу жашаган үй-бүлө мүчөлөрүн тийиштүү аймакта белгиленген жашоо минимумунан кем эмес деңгээлде камсыз кылышы керек.
Эгер эмгек мигранты бир нече аймакта бир убакта иштесе, алардын ичинен эң жогорку жашоо минимумунун өлчөмү эске алынат.
Эгерде бул талап аткарылбаса, мигранттын патенти же иштөөгө уруксаты узартылбайт. Андан кийин ал жашы жете элек балдары менен 15 күндүн ичинде Орусиядан чыгып кетүүгө милдеттүү болот.
Чет элдик жумушчунун балдарынын убактылуу болуу мөөнөтү ата-энесинин патентинин жарактуу мөөнөтүнөн ашпоого тийиш. 18 жашка толгондон кийин, алар өз алдынча патент тариздөөгө же 30 күндүн ичинде өлкөдөн чыгып кетүүгө тийиш.
Мындан тышкары, мыйзам эмгек мигранттарын өздөрү жана жашы жете элек балдары үчүн жеке киреше салыгы боюнча аванстык төлөмдөрдү киргизүүгө милдеттендирет.
