Президент Садыр Жапаров тиешелүү министрликке кырдаалды иликтеп, Кара-Жыгач турак аймагынын тургундарын ичүүчү суу менен камсыздоо үчүн зарыл чараларды көрүүнү тапшырды. Бул тууралуу мамлекет башчысынын Аламүдүн районунун тургундары менен жолугушуусунда белгилүү болду.
Жергиликтүү тургундардан алынган маалыматка ылайык, мурда «АРИС» программасынын алкагында турак аймактын аймагында суу эсептегичтерди орнотуу жана түтүк тартуу боюнча иштер жүргүзүлгөн. Бирок убакыттын өтүшү менен жабдуулар жана коммуникациялар иштен чыгып, суу менен камсыздоо токтогон.
Тургундар ичүүчү сууга жетүү мүмкүнчүлүгү болжол менен эки жыл мурун гана камсыздалганын, ошондон бери суу менен камсыздоо маселеси чечилбей жатканын билдиришти. Жолугушууда Президент Садыр Жапаров ушул программанын алкагында ушундай долбоорлорду ишке ашыруу иретсиз жүргүзүлгөнүн белгилеп, тармактык министрликке текшерүү жүргүзүп, суу менен камсыздоону калыбына келтирүүнү тапшырды.
