Тиешелүү мыйзамдардын аткарылышына мониторинг жүргүзүү алкагында Жогорку Кенештин депутаттары өлкөнүн негизги илимий-изилдөө мекемелеринин ишмердүүлүгүн изилдешти. Энергетикалык жана агрардык секторлорду илимий коштоону камсыз кылган институттар көңүл борборунда болду.
Энергетикалык сектор жана кайра жаралуучу булактар
Жумушчу топ Энергетика министрлигине караштуу Энергетика илимий-изилдөө институтун зыярат кылды. Мекеменин директору Медетбек Айткулов учурдагы натыйжалар, илимий иштин негизги багыттары жана келечектеги пландар жөнүндө отчет берди.
Талкуу учурунда депутаттар Токтобубу Ашымбаева жана Нуржамал Торобекова тармакты сапаттуу илимий коштоонун зарылчылыгына басым жасашты. Негизги маселелер институтту материалдык-техникалык жактан камсыз кылуу, изилдөөлөргө мамлекеттик заказды аткаруу механизмдери, ошондой эле альтернативдик жана кайра жаралуучу энергия булактарынын потенциалын изилдөө боюнча долбоорлорду каржылоо тууралуу болду.
Ветеринария илимин өнүктүрүү
Мониторингдин кийинки этабы Суу ресурстары, айыл чарба жана кайра иштетүү өнөр жайы министрлигине караштуу Арстанбек Дуйшеев атындагы Кыргыз ветеринария илимий-изилдөө институтунун иши менен таанышуу болду. Институттун директору Жайлообек Орозов катышуучуларга лабораториялардын ишмердүүлүгү, ишке ашырылып жаткан долбоорлор жана алынган илимий натыйжалар жөнүндө маалымат берди.
Парламентарийлер жаныбарлардын ооруларын диагностикалоо жана алдын алуу ыкмаларын өркүндөтүү, ошондой эле ветеринария препараттарын өндүрүүнү өнүктүрүү маселелерине өзгөчө көңүл бурушту.
