10-августта Бишкекте экономика илимдеринин доктору, профессор Гүрас Жапаров Биринчи радионун түз эфиринде учурда логистика дүйнөдөгү эң актуалдуу көйгөйлөрдүн бири экендигин билдирди. Анын пикиринде, бул маселе Кыргызстан үчүн да, Евразиялык экономикалык биримдикке (ЕАЭБ) мүчө мамлекеттер үчүн да курч бойдон калууда.
Профессордун айтымында, өзгөчө күйүүчү-майлоочу материалдарды жеткирүү логистикасында оор кырдаал түзүлдү.
Эксперттин белгилешинче, ЕАЭБдин алкагында тоскоолдуктарды азайтуу максатында биргелешкен иштер жүргүзүлүүдө. Бул маселелерди шарттуу түрдө үч багытка бөлүүгө болот: геосаясий, аймактык атаандаштык жана экономикалык.
Гүрас Жапаров биринчи багыт катары геосаясий факторду атады. Азыркы учурда бир тараптан Орусия менен Кытай, экинчи тараптан батыш өлкөлөрү ортосунда белгилүү бир тирешүү түзүлгөн. Бул кырдаалда отун рыногундагы абал да курчуп баратат. Ошондуктан ар бир мамлекет, анын ичинде Кыргызстан да тең салмактуу позицияны карманышы керек.
Ошондой эле, эксперт Кыргызстан менен Казакстандын чек арасындагы өткөрүү пункттарында мурдагыдай узак кезектер байкалбай калганын кошумчалады.
