Ислам революциясынын сакчылар корпусу (ИРСК) Кувейттеги АКШ армиясынын радиоэлектрондук күрөш бөлүмү жок кылынганын билдирди. Иран аскерлери ошондой эле Иорданиядагы америкалык абадан жана ракетадан коргонуу системаларына сокку урулганын маалымдашты.
ИРСК маалыматына ылайык, "Жеңиш-2" операциясынын 26-толкунунун алкагында Аль-Удейри базасына сокку урулган. Иран тарап чабуулдун натыйжасында атайын радиоэлектрондук күрөш бөлүмү жок кылынып, америкалык аскер кызматкерлеринин арасында курман болгондор жана жарадар болгондор бар экенин ырастоодо.
Ошондой эле ИРСК базанын диспетчердик мунарасы да бузулганын айтты. Чет элдик ЖМКлардын маалыматында, Аль-Удейри объектиси Кувейттин түндүгүндөгү америкалык аскер лагери – Кэмп-Бюринг деп да аталат.
Мындан тышкары, ирандык аскерлер Иорданиядагы америкалык базада THAAD ракетадан коргонуу комплексинин радары, Patriot абадан коргонуу системасы жана C-RAM радары жок кылынганын билдиришти.
Тегерандын ырастоосунда, соккулар ошондой эле күйүүчү май сактагычтарга, тик учак жабдууларынын кампасына жана тик учактарды оңдоо жана тейлөө үчүн арналган ангарга тийген.
Америкалык техниканын жок кылынышы жана аскер кызматкерлеринин арасындагы жоготуулар тууралуу маалыматтарга көз карандысыз ырастоо азырынча жок. АКШ аскерлери Иран тарабынан айтылган зыяндын масштабын расмий түрдө ырастаган жок. Иордания бийлиги абадан коргонуу күчтөрү жети ракета менен алты учкучсуз учакты тосуп алганын, курмандыктар жана материалдык зыян жок экенин билдирди.
Өз кезегинде, АКШ Куралдуу Күчтөрүнүн Борбордук командачылыгы Ирандын аймагына жасалган соккулардын 13-түнү аяктаганын билдирди.
