Өзгөчө кырдаалдар министри Канатбек Чыныбаев Ысык-Көл облусуна болгон иш сапарында Ананьево айылындагы №33 өрт-куткаруу бөлүмүнүн жаңы имаратынын курулушуна өзгөчө көңүл бурду. Ал жерден министр курулуш иштерин уюштуруу жана аткаруу боюнча бир катар тапшырмаларды берди.
Мектептердин курулушун текшерүү
Мындан тышкары, министр Ак-Суу районундагы Боз-Учук айылындагы М. Чокуев атындагы орто мектептин жана Токтогул айылындагы А. Сыдыкбеков атындагы орто мектептин курулуш иштерин текшерди. Министрликтен билдиргендей, бул мектептердин курулушу ӨКМ тарабынан Дүйнөлүк банктын колдоосу менен ишке ашырылып жаткан ERIK долбоорунун алкагында жүргүзүлүүдө. Долбоор жер титирөөгө туруктуу мектеп инфраструктурасын жаңыртууга жана өлкөнүн табигый кырсыктардын тобокелдиктерине туруктуулугун жогорулатууга багытталган.
ERIK долбоорунун алкагында
Республика боюнча бул долбоордун алкагында 23 жаңы мектеп курулуп, дагы 17 мектеп реконструкцияланат деп пландалууда.
Кар көчкү станциясынын курулушу
Канатбек Чыныбаев ошондой эле Ак-Суу районундагы Жыргалаң айылындагы «Ала-Тоо Резорт» пансионатынын аймагында Кыргызгидрометтин кар көчкү станциясынын курулушу менен таанышты. Бардык объекттерди кыдырып чыккандан кийин министр жооптуу кызматкерлерге тиешелүү тапшырмаларды берди.
