Тармакта Караколдо Ысык-Көл көлүнө канализациялык агынды суулар төгүлүп жатат деп ырасталган видео пайда болду. Ушундай билдирүүлөр колдонуучулардын арасында нааразычылык жаратып, алар мамлекеттик органдардын экологиялык нормаларды сакташы тууралуу суроолорду бере башташты.
Табигый ресурстар министрлигинин текшерүүсүнүн жыйынтыктары
Билдирүүлөргө байланыштуу Табигый ресурстар, экология жана техникалык көзөмөл министрлигинин алдындагы экологиялык жана техникалык көзөмөл кызматы жеринде текшерүү жүргүздү. Ведомстводон билдиришкендей, көрсөтүлгөн аймакта мамлекеттик деңгээлдеги заманбап балык чарбасын куруу боюнча курулуш иштери жүрүп жатат.
Иштердин жүрүшүндө жер астындагы суулар менен толгон котлован пайда болгон. Сууну курулуш аянтынын сыртына чыгарууну камсыздоо үчүн аны насос жабдуулары менен сордуруп чыгарып, Ысык-Көл көлүнө төгүшкөн.
Ошентип, ведомство сууну төгүү долбоорду ишке ашыруунун алкагында жер астындагы сууларды сордуруп чыгаруу процесси менен байланыштуу экенин тактады. Пристань айылында ишке ашырылып жаткан заманбап балык чарбасынын долбоорунун өзү Ысык-Көл көлүнүн биологиялык ар түрдүүлүгүн калыбына келтирүүгө жана жергиликтүү балык промыселин өнүктүрүүгө багытталганы белгиленди.
