Кыйынчылыктар 24-июлда башталган: колдонуучулар «Korona» тиркемесинде жеткиликтүү багыттардын тизмесинен Грузия, Казакстан жана Беларусия жоголуп кеткенин байкашкан. Кийинчерээк тизмеден Азербайжан да жок болгон.
Төлөм системасынын колдоо кызматы айрым багыттар азыр жеткиликсиз экенин тастыктап, бирок аларды калыбына келтирүү мөөнөтүн айта алган жок.
Россиялык маалымат каражаттары чектөөлөрдү Европа Биримдигинин жаңы санкциялар пакети менен байланыштырып жатышат. Бул чектөөлөргө «Золотая корона» төлөм системасынын эсептешүү борбору жана оператору болгон «Платежный центр» РНКОсу туш болгон. Компания өзү которуулардын токтотулушу санкциялар менен байланыштуу экенин ачык жарыялаган эмес.
24-25-июлга карата «Korona» тиркемесинде Орусиядан акча жөнөтүү үчүн үч гана чет өлкөлүк багыт — Кыргызстан, Өзбекстан жана Түркия жеткиликтүү бойдон калган.
Кыргызстанга акчаны «Korona» тиркемеси аркылуу мурдагыдай эле жөнөтүүгө болот, ал эми алуучулар аларды накталай түрдө берүү пункттарынан алып же, эгерде мындай функция жеткиликтүү болсо, банктык картага которо алышат.
Ошол эле учурда, «Золотая коронанын» сайтында иш жүзүндө которуулар токтотулган өлкөлөр дагы эле көрсөтүлүшү мүмкүн. Системанын өзү багыттардын тизмеси өзгөрүп жатканын эскертет, ошондуктан жөнөтүүнүн актуалдуу мүмкүнчүлүгүн түздөн-түз «Korona» тиркемесинен текшерүү керек.
Грузия, Казакстан, Беларусия жана Азербайжанга которуулар качан кайра жанданары азырынча белгисиз.
