11-ноябрда Кыргызстанда кыргыз тили жана география мугалимдерине ата мекендик өндүрүштүн 6 миң ноутбугу тапшырылды. «Алтын Казык» бренди астында чыгарылган техника райондук билим берүү бөлүмдөрү аркылуу педагогдорго бөлүштүрүлөт.
Билим берүү министрлигинин билдирүүсүнө ылайык, программаны ишке ашыруунун учурдагы этабында өлкөдөгү бардык география мугалимдерин ноутбуктар менен камсыз кылуу пландалууда. Билим берүү чөйрөсүн санариптештирүү процесси «Алтын Казык» мамлекеттик программасынын алкагында улантылат.
Педагогдорду камсыз кылуу динамикасы
Жабдыктар И. Раззаков атындагы Кыргыз мамлекеттик техникалык университетинин «Технопаркында» чогултулган. Бардык түзүлүштөр белгиленген техникалык талаптарга жооп берет жана автоматтык түрдө жаңылануу функциясы бар лицензияланган программалык камсыздоо, коргоо каражаттары, ошондой эле адистештирилген методикалык куралдар менен жабдылган.
Техниканы жеткирүү Smart-Ed долбоорунун алкагында жүргүзүлүүдө. Долбоор Билим берүү министрлиги тарабынан Ислам өнүктүрүү банкынын (IsDB), Билим берүү чөйрөсүндөгү глобалдык өнөктөштүктүн (GPE) жана Өнүктүрүү максаттарындагы ислам солидардуулук фондунун (ISFD) колдоосу менен ишке ашырылууда.
