Бүгүнкү күндө маалымат каражаттары менен аналитикалык борборлордун ортосундагы кызматташтык өзгөчө мааниге ээ. Бул тууралуу көз карандысыз журналисттер уюмунун төрагасы Азамат Касыбеков Шанхай кызматташтык уюмунун (ШКУ) медиа жана аналитикалык борборлор форумунда билдирди.
Касыбековдун айтымында, ММК жана аналитика ар дайым тыгыз байланышта болгон. Аналитиктер өз баалоолорун жана жыйынтыктарын коомчулукка, бийлик органдарына жана чечим кабыл алуучуларга маалымат каражаттары аркылуу жеткирип келишкен.
Маалымат мейкиндигинин өзгөрүп жатканына байланыштуу, ошого жараша ММК да өзгөрүүдө. Негизги маселе — талдоону адамдарга түшүнүктүү жана жөнөкөй тилде кантип жеткирүү керек. Анткени талдоо ар дайым татаал процесс болуп саналат.
Азамат Касыбеков азыркы жаштардын маалыматты кабыл алуусу да өзгөргөнүн белгиледи. Анын пикиринде, кыска форматтарга көнүп калган аудитория үчүн терең аналитикалык материалдарды берүүнүн жаңы ыкмаларын издөө зарыл.
Форумдун негизги максаттарынын бири — жасалма интеллекттин өнүгүшү жана социалдык тармактардын кеңейиши сыяктуу жаңы чакырыктардын шартында тажрыйба алмашуу жана мындан аркы иштин багыттарын талкуулоо болуп саналат.
