Бишкек шаарындагы «Ак-Кеме» мейманканасында Кыргызстандын курулуш тармагындагы ири долбоорлору көрсөтүлдү. Бул иш-чара «Борбордук Азия – Кытай» курулуш министрлеринин экинчи конференциясынын программасынын алкагында өткөрүлдү.
Курулуш, архитектура жана турак жай-коммуналдык чарба министрлигинин билдирүүсүнө ылайык, экспозицияда ири объекттердин архитектуралык макеттери жана долбоордук чечимдери атайын мультимедиялык экрандар жана санариптик жабдуулар аркылуу көрсөтүлдү.
Кыргыз Республикасынын курулуш, архитектура жана турак жай-коммуналдык чарба министри Нурдан Орунтаев делегация башчыларын көргөзмө менен тааныштырып, өлкөдө, анын ичинде туристтик аймактарда ишке ашырылып жаткан масштабдуу инфраструктуралык долбоорлор тууралуу маалымат берди.
Иш-чарага төмөнкүдөй жогорку деңгээлдеги өкүлдөр катышты:
- «Борбордук Азия – Кытай» форматынын катчылыгынын башкы катчысы Сунь Вэйдун
- Кытай Эл Республикасынын турак жай, шаардык жана айыл-чарба курулуш министри Ни Хун
- Казакстан Республикасынын өнөр жай жана курулуш министри Ерсайын Нагаспаев
- Тажикстан Республикасынын Өкмөтүнө караштуу Архитектура жана курулуш комитетинин төрагасы Низом Юсуфи Мирзозода
- Түркмөнстандын курулуш жана архитектура министри Абдулла Гелдиев
- Өзбекстан Республикасынын курулуш жана турак-жай коммуналдык чарба министри Шерзод Хидоятов
Министр Нурдан Орунтаев чет өлкөлүк өкүлдөрдү Кыргызстандын климаттык өзгөчөлүктөрү жана туристтик потенциалы менен тааныштырып, республикага жылдын каалаган мезгилинде келип кетүүгө чакырды. Көргөзмөнүн негизги максаты — эл аралык өнөктөштөрдү тартуу, инвестициялык мүмкүнчүлүктөрдү көрсөтүү жана курулуш тармагындагы кызматташтыкты кеңейтүү.
