Бишкекте өткөн ШКУнун ЖМК жана аналитикалык борборлорунун форумунда сүйлөп жатып, Павел Негоица жасалма интеллекттин өнүгүшү медиа тармагы үчүн жаңы мүмкүнчүлүктөрдү ачканы менен, бир эле учурда олуттуу чакырыктарды да жаратып жатканын айтты. Ал бул багытта эл аралык кызматташтыкты жана тажрыйба алмашууну өнүктүрүү зарылдыгын белгиледи.

Негоицанын пикири боюнча, Шанхай кызматташтык уюмунун 25 жылдыгында Шанхайда Жасалма интеллект жаатындагы кызматташтыктын дүйнөлүк уюмунун түзүлүшү жаңы технологиялардын азыркы дүйнөдөгү өсүп жаткан ролунун логикалык чагылышы болуп саналат.

Ал Кытайдын заманбап коммуникация системаларын өнүктүрүүдө жасалма интеллектти активдүү колдонуп жатканын да баса белгиледи. Анын айтымында, «Синьхуа» агенттиги сыяктуу кытайлык медиа структуралары маалымат тармагында ЖИ технологияларын колдонууда олуттуу натыйжаларга жетишти.

Бүгүнкү күндө жасалма интеллектти өнүктүрүүнүн ар кандай моделдери бар — кытайлык, англис тилдүү, россиялык жана башка ыкмалар. Эң чоң чакырык — бул көп улуттуу билимдин, тажрыйбанын жана технологиялардын байлыгын, айрыкча медиа тармагында, бирдиктүү кесиптик системага бириктире алабызбы же жокпу, ошол.
Павел Негоица, «Российская газета» гезитинин башкы директору

«Российская газета» гезитинин башкы директору ШКУ өлкөлөрү маалыматтык кызматташтыкты кеңейтүү үчүн чоң потенциалга ээ экенин баса белгиледи. Анын пикиринде, бирдиктүү медиа хаб түзүү жаңылыктар, репортаждар, аналитикалык материалдар жана кесиптик тажрыйба алмашуу үчүн натыйжалуу аянтча боло алат.