"Кабар" агенттигинин маалыматына ылайык, Министрлер Кабинетинин Төрагасынын орун басары, Суу ресурстары, айыл чарба жана кайра иштетүү өнөр жайы министри Эрлист Акунбеков Бишкек шаарындагы "Wool KG" жүн иштетүүчү ишканасына барды. Ишкана жергиликтүү жүн чогултуу, жууп, иштетүү, тараган жүн өндүрүү менен алектенип, учурда өндүрүш кубаттуулугун кеңейтүү долбоорун ишке ашырууда.

Учурда "Wool KG" Ысык-Көл, Нарын, Талас жана Чүй облустарынын фермерлеринен жана даярдоочуларынан жыл сайын болжол менен 400 тоннага жакын жүн сатып алат.

Ишкананын көрсөткүчтөрү

71адам иштейт
400 тоннажүн сатып алат
50+жаңы жумуш орундары

Долбоор ишке ашса, өлкө ичиндеги чийки затты кайра иштетүү көлөмү көбөйүп, продукциянын кошумча наркы жогорулап, экспорттук мүмкүнчүлүктөр кеңейет деп белгиленет.

Жогоруда аталган иш сапардын жүрүшүндө Эрлист Акунбеков өндүрүш процесси менен таанышып, жүндү терең иштетүүнү өнүктүрүү мамлекеттик саясаттын артыкчылыктуу багыттарынын бири экенин баса белгиледи.

«Биздин негизги максатыбыз – чийки затты экспорттобой, аны өлкө ичинде кайра иштетип, даяр продукциянын көлөмүн көбөйтүү. Бул фермерлер үчүн туруктуу сатуу рыногун түзүп, жаңы жумуш орундарын ачып, кайра иштетүү өнөр жайын өнүктүрүүгө өбөлгө болот. Министрлик мындай демилгелерди мындан ары да колдоого даяр», — деп белгиледи министр.
Эрлист Акунбеков