2026-жылдан 2027-жылга чейин Кыргыз Республикасы менен Өзбекстандын маданият министрликтеринин ортосунда маданий кызматташтыкты өнүктүрүү боюнча иш-аракеттер планы түзүлүп, кол коюлду. Бул документ эки өлкөнүн маданий байланышын жаңы деңгээлге чыгарууну көздөйт.
Пландын негизги максаты – кыргыз-өзбек маданий-гуманитардык кызматташтыгын мындан ары бекемдөөгө, чыгармачыл байланыштарды кеңейтүүгө, ошондой эле биргелешкен долбоорлорду жүзөгө ашырууга шарт түзүү болуп саналат.
Документ 30-июлда Өзбекстандын президенти Шавкат Мирзиёевдин мамлекеттик визити маалында имзаланган. Бул макулдашуу жогорку деңгээлдеги сүйлөшүүлөрдүн жыйынтыгы жана эки өлкөнүн маданий тармактагы кызматташтык келишимдерин ишке ашырууга багытталган.
Планда ТЮРКСОЙ, ЮНЕСКО, Экономикалык кызматташтык уюму жана АЙСЕСКО сыяктуу эл аралык уюмдар менен ынтымакты күчөтүү, министерликтердин туруктуу консультацияларын өткөрүү жана биргелешкен демилгелерди координациялоо каралган.
Ошондой эле планда эки тараптын маданий топторунун эл аралык фестивалдарга, сынактарга катышуусу, этнофольклордук экспедициялар өткөрүү, кино, театр, музыка тармактарында кызматташууну өнүктүрүү сунушталууда.
Документ ошондой эле маданий тармактагы адистерди даярдоо жана тажрыйба алмашуу, билим берүү мекемелери менен кызматташуу, нематериалдык маданий мурастарды изилдөө жана жайылтуу программаларын ишке ашыруу мүмкүнчүлүктөрүн да карайт.
Андан сырткары, эки өлкөнүн өкүлдөрү эл аралык маданий форумдарга, театр жана музыка тармагындагы чоң деңгээлдеги иш-чараларга активдүү катышууну улантышат.
