«Кабар» агенттиги билдиргендей, Өзбекстан Республикасынын чыгармачыл делегациясы Кыргызстанга келди. Делегация 27-28-июлда Чолпон-Ата шаарында өтүүчү Өзбекстандын Маданият күндөрүнө катышат.
Делегацияны «Ысык-Көл» эл аралык аэропортунда (Тамчы) Кыргызстандын Маданият, маалымат, спорт жана жаштар саясаты министринин орун басары Аскаралы Мадаминов тосуп алды.
Өзбек делегациясын өлкөнүн маданият министри, эл артисти Озодбек Назарбеков жетектейт.
Делегациянын курамына маданият жана искусство тармагынын 200гө жакын өкүлү, анын ичинде белгилүү аткаруучулар, музыканттар, бий топтору, маданият ишмерлери жана чыгармачыл интеллигенциянын өкүлдөрү кирди.
Эки күндүн ичинде алар Ысык-Көл облусунун жашоочуларына жана конокторуна бай тарыхый-маданий мурасты жана өзбек искусствосунун заманбап жетишкендиктерин чагылдырган бай маданий программа тартуулашат.
Ведомство белгилегендей, Маданият күндөрүн өткөрүү Кыргызстан менен Өзбекстандын маданий жашоосундагы маанилүү окуя болуп, эки өлкөнүн ортосундагы маданий-гуманитардык кызматташтыкты жана достук мамилелерди мындан ары да чыңдоого өбөлгө түзөт.
