Ош шаарынын мэриясынын делегациясы Өзбекстандын Самарканд шаарында өткөн боордош шаарлардын эл аралык форумуна катышты. Бул маанилүү иш-чарага Кыргызстан, Өзбекстан, Түркия, Япония, АКШ, Франция жана Россиядан муниципалитеттердин, эл аралык уюмдардын жана бизнес-коомчулуктун өкүлдөрү чогулушту.
Кызматташуу меморандуму
Форумдун алкагында Ош жана Наманган шаарларынын ортосунда кызматташуу жөнүндө меморандумга кол коюлду. Документ соода-экономикалык, илимий-техникалык, билим берүү, маданий жана спорт тармактарында өз ара аракеттенүүнү өнүктүрүүнү караштырат.
Инвестиция жана туризм
Ош шаарынын мэриясынын аппарат жетекчиси Мыктыбек Осмоналиев чет элдик өнөктөштөр менен бир катар жолугушууларды өткөрдү. Жолугушууларда инвестиция тартуу, туристтик потенциалды өнүктүрүү жана шаардык башкарууга санариптик чечимдерди киргизүү маселелери талкууланды.
Мэрия белгилегендей, эл аралык байланыштарды өнүктүрүү Оштун инвестициялык жагымдуулугун жогорулатып, шаардын туруктуу өнүгүүсү үчүн жаңы мүмкүнчүлүктөрдү түзөт.
